Proyecto PASADIA lo tin 10 facilidad operacional pa fin di aña aki
ORANJESTAD - Recientemente Ministerio di Transporte, Integridad, Naturalesa y Asunto
di Adulto Mayor, a duna di conoce cu e proyecto di dagverblijf, esta opvang pa adulto mayor durante dia, lo tin 10 luga operacional pa fin di 2024.
Lo tin 3 tipo di PASADIA;
- Concepto completo unda cu ta habri un sitio nobo y ta opera for di un ekipo exclusivamente dedica na Pasadia. (preto riba e mapa);
- Concepto ehecuta cu un instancia existente haciendo uzo di operacion y facilidadnan existente. (blauw riba e mapa;)
- Concepto satelite unda cu instancianan ta opera como concepto di PASADIA pero no ta ricibi fondo di Gobierno. (cora riba e mapa).
Di e concepto completo lo habri 5 Pasadia na e siguiente localidad; Oranjestad, FCCA Cunucu Abou, FCCA Paradera, Kibrahacha y Praktijk di Dokter na San Nicolas.
Di e concepto colaborativo lo habri 4 Pasadia den colaboracion cu Cas Marie San Nicolas, Cas Marie Santa Cruz, S.A.BA. Oranjestad y S.A.B.A. San Nicolas.
Finalmente na Rode Kruis San Nicolas lo habri e di tres concepto unda cu e instancia lo percura pa educa y prepara su ekipo pa opera como un Pasadia.
E Pasadia lo duna nos grandinan e apoyo necesario for di un cuadro social y lo hisa nan calidad di bida y a la bes alivia nos sistema di cuido riba Aruba.
Ministerio di Asunto di Adulto Mayor ta gradici tur partner di Pasadia pa comparti nan vision y traha riba e Aruba cu nos grandinan merece.
