Prome Minister presente na ceremonia di despedida di presidente di Hoge Raad na Den Haag

Dineke de Groot ta finalisando su periodo di seis aña como presidente di Hoge Raad, e instancia hudicial mas halto di Reino Hulandes pa asuntonan civil, penal y fiscal. E institucion aki tin un papel importante den proteccion di estado di derecho, independencia di husticia y aplicacion uniforme di ley den Reino. 

Durante e ceremonia solemne, Dineke de Groot a ricibi un condecoracion real, nombra como Commandeur in de Orde van Oranje-Nassau, un reconocemento pa su servicio. For di 1 di november 2026, Maarten Kroeze lo asumi e funcion di presidente di Hoge Raad. Dineke de Groot lo sigui activo como miembro di e camara civil di e institucion. 

E despedida a tuma luga durante un sesion extraordinario di e Hoge Raad. 

Presencia di Prome Minister Eman na e ceremonia ta subraya e importancia di mantene relacion institucional entre Aruba y e organonan hudicial di Reino Hulandes, cu respet pa independencia di husticia y estado di derecho.