Prome minister a reuni cu Secretario di Estado nobo sr. Zsolt Szabó

E meta di e reunion tabata pa cera conoci cu otro, y papia riba e prioridadnan di ambos banda.

Prome Minister a informa sr. Szabó con Aruba ta para actualmente y a elabora riba e situacion economico, turismo, desempleo, y inflacion. Tambe a informa sr. Szabó riba e desaroyo financiero, presupuesto y e prioridad pa traduci esaki den bienestar pa e comunidad di Aruba den forma di aumento di poder di compra y reduccion di pobresa.

Tambe a menciona e retonan cu tin actualmente, di cual un ta e negociacion cu Hulanda cu awor tin cu cuminsa cu e gobierno nobo pa asina purba yega na un interes abou definitivo pa cu e debe di COVID. Ademas a trata e tema importante cu ta cambio climatico y transicion di energia.

Secretario di Estado Szabó lo bishita Aruba na augustus pa cera conoci cu e isla, y pa e tin un miho bista di e trabou cu Gobierno y comunidad en general a bin ta eherciendo na bienester di Aruba su progreso.