Prome Minister a reuni cu CEDEHM riba e posicion di hende muhe

CEDEHM a haci un estudio cu a trece informacion dilanti di e perfil di e hende muhe na Aruba na aña 2024.

E resultado di e estudio profundo a mustra riba cua terenonan e hende muhe na Aruba ta mas activo. Den algun area a refleha cifranan cu ta basta bon, mirando cu mas di 40% di managernan di companianan na Aruba ta hende muhe. Sinembargo dato menos positivo ta indica cu segun e registro di Camara di Comercio, solamente 15% di directornan di companianan registra ta femenino. A base di e datonan aki por wak cu na Aruba ainda tin hopi pa mehora.

Otro tema di importancia cu a toca durante e reunion cu CEDEHM ta e conferencia di SIDS cu lo tuma luga fin di mei 2024 na Antigua and Barbuda. Nacionnan Uni ta organisa e Small Island Developing States Conference cu ta tuma luga cada 10 aña. SIDS Confrence ta solamente pa paisnan chikito, pa duna nan e atencion debido, ya cu den otro conferencianan grandi unda tur pais ta participa, e chens pa paisnan chikito haya e atencion ta limita.

Aruba ta bay tin un rol hopi importante pa desplega. Un di nan ta hunto cu UN Women, cu ta e agencia di Nacionnan Uni cu ta atende cu e derechonan di hende muhe y lo tin un conferencia di dos dia riba e tema di e posicion di hende muhe. Aruba, representa pa Prome Minister Evelyn Wever-Croes ta invita pa duna e discurso di apertura durante e conferencia aki. Pa e motibo aki e mandatario hunto cu CEDEHM, ta trahando riba e puntonan cu mas lo mester bay enfoca riba dje pa cu esaki.

A encarga CEDEHM pa lidera un comision pa traha pa stop abuso di hende muhe cu ta un tema hopi importante y e trabounan ta bayendo den bon direccion.