Prome Minister a lidera delegacion di Reino na "Summit of the Future" di Nacionnan Uni

Summit of the Future, ta un encuentro internacional importante cu e meta pa fortalece cooperacion mundial y garantisa un futuro sostenibel pa generacionnan venidero. 

Reunion cu US State Department 

Un tema importante cu a discuti tabata e US Customs and Border Protection-Preclearance. 
Aruba ta den un re-negosacion cu Merca di e tratado pa amplia e capacidad di e preclearance na Aruba mirando e cantidad adicional di turista di Merca cu ta bishitando Aruba. Ademas a trata e topico di Trafficking in Persons (TIP) Report. Merca ta evalua Aruba cada aña y ta raporta esaki den e Trafficking in Persons (TIP) Report. Te na e momento aki Aruba a mantene tier 2 pero no obstante di esaki Aruba ta trahando duro pa yega tier 1.  

Ademas a elabora riba e situacion politico na Venezuela y kico ta spera despues di e eleccion Presidencial. Merca a indica cu nan ta keda para riba e hecho cu mester bin mas transparencia den e situacion, y lo sigui observa e desaroyonan di cerca, mientras cu Prome Minister a duna un bista di e impacto cu e situacion na Venezuela tin riba Aruba.

Conferencia di UN Women tocante abuso contra hende muhe y mucha muhe

E conferencia aki a atende cu e necesidad urgente pa frena abuso contra hende muhe y mucha muhe rond di mundo. E “Pact for the Future” ta reconoce e importancia di igualdad di genero y con esencial e empoderamento di muhe y mucha muhe ta pa e desaroyo sostenibel. Apesar cu Aruba no ta elegibel pa ta parti di e “Spotlight Initiative”, nos ta enfoca tur esfuerso riba prevencion di violencia y proteccion di sobrevivientenan di violencia di genero. 
Na New York, Prome Minister hunto cu Minister President di Jamaica a organisa un conferencia riba e rol di hobennan den futuro. E conferencia tawata basa riba “Declaration on Future Generations”, cu ta un declaracion cu ta explora solucionnan pa salvaguardia e necesidadnan di futuro generacionnan riba temanan di demografia, clima y desaroyo.

Panel inteligencia artificial organisa pa United Arab Emirates y UNDP

Prome Minister a forma parti di un panel cu a trata Inteligencia Artificial (AI). UAE hunto cu UNDP a lansa “AI4SD”, cu ta ofrece “open source data”, recursonan pa entrenamento y hermentnan pa colaboracion cu ta enfoca riba promove e Metanan di Desaroyo Sostenibel riba tereno di desigualdad, pobresa, accion climatico y siguridad alimenticio, cu posibilidad pa expande riba otro tereno. Prome Minister a enfoca riba e vision ambicioso di Aruba basa riba resiliencia, innovacion y e compromiso cu sostenibilidad y progreso.