Prome Minister a atende e acto ceremonial di traspaso di mando Presidencial na Panama
ORANJESTAD - Dialuna 1 di juli 2024, Prome Minister Evelyn Wever-Croes a atende e acto ceremonial di traspaso di mando Presidencial na Panama, entre e Presidente saliente, sr. Laurentino Cortizo y e Presidente nobo sr. José Raúl Mulino.
Despues di e ceremonia, esnan presente tabata tin e oportunidad di saluda y combersa un poco cu Presidente Mulino y e Primera Dama.
Presente na e ocasion special aki tabata Rey Felipe VI di Spaña, y e presidentenan di Colombia, Republica Dominicana, Costa Rica, Honduras, y di Barbados. Tambe tabata presente Prome Minister di Aruba y di Belize y Vice-Presidente di Guatemala y di El Salvador.
Un di e metanan di Gobierno di Aruba ta pa posiciona Aruba como un pais fuerte den region, pa asina logra ta poco mas independiente di Hulanda. P'esey eventonan asina, na unda Aruba tin e oportunidad di estrecha lasonan cu otro pais ta di suma importancia. E acto ceremonial aki tabata un momento oportuno pa por a cera conoci y combersa cu e representantenan di e paisnan presente, pa asina estrecha lasonan y realisa e deseo di ta mas fuerte posiciona.
Prome Minister, den nomber di Aruba y di Reino, ta desea Presidente José Raúl Mulino y henter e pueblo di Panama hopi exito y tur cos bon den e periodo nan dilanti.
