Prome grupo di hoben ta logra nan certificado di Programa Piskechi

Durante e clausura di e prome curso di Programa Piskechi, e participantenan a ricibi nan certificado como reconocemento di nan experiencia nobo, facilita pa partner Oasis Fishing & More di senor Chito Rasmijn, un persona pasiona cu pesca y cu hopi expertisio. Programa Piskechi ta ofrece hoben entre 10 y 17 aña e oportunidad pa conoce di cerca e arte di pesca na man, y asina aumenta nan aprecio y participacion  den esaki.

Minister Geoffrey Wever a felicita tur participante y a enfatisa cu inverti den e generacion nobo ta esencial pa sigui fortalece e capacidad y resiliencia di sector primario, pa e por sigui  crece y bira mas fuerte.

“Nos sector primario ta fundamental pa Aruba su futuro. Door di involucra e generacion nobo na un edad jong den agricultura, pesca y otro actividadnan den e sector, nos ta preserva conocemento tradicional, stimula interes den e profesionnan aki y ta crea un fundeshi mas fuerte pa Aruba su  Sector Primario,” Minister Wever a expresa.

“Mi ta gradici senor Chito Rasmijn cu su team pa ofrece e serie di curso aki na nos hobennan y yuda nos pa sigui promove pesca bow di nos hubentud. Senor Chito Rasmijn a haci e curso na un forma hopi profesional, cu hopi dedicacion y pasenchi y mi ta sumamente agradecido na senor Chito Rasmijn y su team”, segun Minister Geoffrey Wever.

E programa lo ripiti mensualmente, unda un weekend un grupo nobo di 10 hoben lo participa den e curso cu ta consisti di practica y teoria.  

Programa Piskechi ta forma parti di e compromiso di gobierno pa fortalece sector primario, promove siguridad alimentario y sigui inverti den desaroyo. Door di combina tradicion cu enseñansa practico, e programa ta contribui na forma e siguiente generacion di esnan cu ta stima e arte di pesca y tambe lidernan den sector primario di Aruba.