Prohibicion di e-stepnan ta un tendencia internacional pa proteha siguridad publico

E decision aki ta pa frena problemanan serio relaciona cu siguridad y cumplimento cu ley.

Durante e ultimo añanan, e-stepnan a bira popular den diferente pais. Sinembargo, tambe a registra un aumento significativo den accidente, lesionnan serio y problema relaciona cu e uzo iresponsabel den espacionan publico. Esakinan ta motibo cu rond mundo, varios pais a tuma decision pa of prohibi of regula e uzo di e vehiculonan aki. Na Belgica, Reino Uni, Republica Checa, Francia, Spaña, Singapore, Alemania, Italia y Hulanda a tuma decision pa prohibi of regularisa uzo di e-steps y ta enforsa cumplimento cu ley cu man duro. Na Bruselas, mas cu 660 persona a resulta herida den accidente cu e-step durante 2025, locual a pone cu autoridad a dicidi cu lo elimina e vehiculonan aki for di espacio publico entrante 2027.

E intencion na Aruba no ta pa warda te ora cu tin mas accidente grave of fatal of otro consecuencia serio prome cu actua. Gobierno tin e responsabilidad pa evalua riesgonan potencial y tuma accion preventivo pa proteha ciudadano, peatonnan y otro usuarionan di caminda publico.

Ademas di preocupacionnan di siguridad, na Aruba companianan a scoge pa ofrece e-stepnan pa verhuur sin tin di e permisonan y autorisacionnan oficial necesario pa haci actividad comercial. E situacion aki ta crea un problema adicional, mirando cu ningun actividad comercial cu ta uza espacio publico of infrastructura publico por opera sin e control y supervision cu ley ta exigi.

Minister di Husticia, mr. drs. Arthur Dowers a enfatisa cu innovacion y forma nobo di transporte semper ta bonbini, pero mester tuma luga dentro di e marco legal existente y cu respet pa siguridad publico. Ningun compania no por introduci un servicio comercial sin mas cu e speransa cu gobierno lo adapta e ley despues na nan necesidad. E proceso corecto ta pa consulta cu autoridadnan competente, cumpli cu e rekisitonan legal y haya e permisonan corespondiente prome cu cuminsa operacion.

E decision di prohibi e-stepnan ta basa riba e principio di prevencion, siguridad y bon gobernacion. E prohibicion aki no ta unicamente tumando luga na Aruba, sino  rond mundo unda autoridadnan a conclui cu e beneficio di e vehiculonan aki no ta compensa e riesgo y inconveniencia cu nan por causa pa peatonnan, automobilista y comunidad en general.

Ministerio di Husticia a sigura cu ta atendiendo cu e doñonan di e e-stepsnan cu ta haci negoshi cu esakinan y mientrastanto a tuma pasonan necesario pa encamina e proceso conforme ley.