Programa Informativo en conexion cu introduccion di Papiamento den klas 1di scol básico
ORANJESTAD – Ministerio di Enseñansa ta informa cu awe nochi, 22 di juli 2024, cuminsando 9:15 di anochi, Canal 22 Aruba y Telearuba lo transmiti un programa educativo en conexion cu introduccion di Papiamento den klas 1di scol básico (Maneho di Idioma.
Entrante aña escolar 2024-2025, e alumnonan di klas 1 di scol basico lo siña lesa y skirbi na Papiamento. Lo duna Hulandes cu un acercamento nobo cu ta pas mas den e contexto di nos muchanan. E ta cientificamente proba cu si e muchanan forma un base fuerte den nan propio idioma, nan por siña e otro idiomanan hopi mas facil y miho. Ademas, siña lesa y skirbi den idioma materno Papiamento lo haci cu e muchanan lo compronde loke nan ta skirbi y lesa y lo stimula nan habilidadnan di siña en general.
Esaki lo ta beneficioso pa e muchanan, mirando cu nan lo bira critico di pensamento y lo ta mas prepara pa duna nan opinion durante les. Ademas di esaki, nan por conecta miho cu nan rais cultural. E muchanan lo sinti mas sigur den nan proceso di siñamento, pasobra esaki ta alinea cu nan idioma materno y nan cultura.
Pueblo di Aruba ta cordialmente invita pa sintonisa programa en conexion cu introduccion di Papiamento den klas 1 di scol basico a traves di TeleAruba, Canal 22 y pagina di Facebook Gabinete Wever-Croes, cuminsando 9:15 di anochi.