Presidente saliente di comision Condecoracion Real a bishita Prome Minister

Despues di hopi aña cu a fungi boluntariamente den e funcion aki, sra. Filomena ta tuma despedida como Presidente di e Comision Condecoracion Real na Aruba. Pa e ocasion special aki sra. Natasha Anthony, Presidente nobo, hunto cu e comision a bishita Prome Minister pa gradici sra Filomena pa e servicio y dedicacion na algo asina importante.

E comision di Condecoracion Real ta ricibi tur proposicion cu e ciudadanonan ta haci y evalua si ta cumpli cu tur e rekisitonan y ta mira unda mester mas hustificacion pa substancia e proposicion. Esaki ta un trabou grandi y totalmente riba base boluntario y durante hopi aña sra. Filomena Lopez a guia e comision aki como presidente. Despues di e proceso aki na Aruba, ta manda e proposicion Hulanda unda e organisacion di Kapittel voor de Civiele Orden ta tuma e decision si ta duna e condecoracion.

Mientrastanto, e tanda di Condecoracion Real 2025 a cuminsa y formularionan ta disponibel na Bestuurskantoor, na Hulp Bestuurskantoor San Nicolas y na tur MFA. 

Tambe por download e formularionan aki:

• Brief bij formulieren Pap. versie;
• Brief bij formulieren Ned. Versie;
• Voorstelformulier Aruba 2025;
• Voorstelformulier Nederland 2025.

Ciudadanonan cu kier nomina un persona pa e condecoracion real, por yena tur dos formulario y entrega esakinan prome cu 31 di juli 2024.