Presidente di Conseho Sociaal-Economico di Hulanda (SER) ta ricibi Prome Minister di Aruba

E reunion a concentra riba dos punto central: 

• Un economia cu ta crece di forma sostenibel;
• un sociedad cu ta probecha directamente di e beneficionan relaciona.

E Gobierno di Aruba ta pone enfasis no solamente riba turismo sostenibel y diversificacion economico, sino tambe riba cohesion social y igualdad di oportunidad pa nos comunidad. No por midi prosperidad unicamente cu cifranan financiero, pero tambe den calidad di bida: barionan mas fuerte, miho scolnan, infrastructura moderno, como tambe proteccion y recuperacion di nos naturalesa.

Un punto crucial den e discusion tabata e manera den cual empresanan y e sector hotelero por integra practicanan di responsabilidad social den nan strategia di negocio. Esaki ta mustra cu progreso empresarial y bienestar di comunidad ta cana man den man. Gobierno ta trahando riba un modelo di desaroyo unda ganashi economico ta bay paralelo cu e bienestar di e trahadonan, barionan y medio ambiente.

E dialogo cu ta organiza na Aruba lo duna un plataforma pa e sector hotelero y empresarial pa comparti experencia y fortifica e compromiso cu sociedad. Den esey, SER ta keda un aliado clave, como un organo cu ta guia gobierno cu conseho riba direccionnan strategico, analisa oportunidadnan y subraya e necesidad di dialogo.

Nos isla ta na un momento crucial. Despues di pandemia, a demostra cu solidaridad y cooperacion internacional ta vital pa sobrevivi,. Aruba ta trahando pa un futuro den cual stabilidad economico, prosperidad social y proteccion ambiental ta inseparablemente conecta.

Crecemento económico ta importante, pero e prosperidad mester refleha den bida diario di cada cuidadano Arubano. Riba caminda pa un futuro sostenibel, Aruba mester traha hunto cu socionan internacional pa sigura cu nos pueblo, nos naturalesa y nos pais ta florece hunto.