Presentacion di Sustainable Development Goals

Riba peticion di Schakel College, Minister di Asunto Economico, Comunicacion y Desaroyo Sostenibel, Geoffrey Wever a duna un presentacion na alumnonan di leerjaar 2 mavo-havo-vwo. Na un manera interactivo, a splica e metanan di desaroyo sostenibel na e alumnonan, y e retonan cu ta rekeri colaboracion di tur persona den sociedad, y e metanan cu kier logra door di accion continuo. E alumnonan tabatin hopi interes y afinidad cu e topico, y algun hasta preguntanan critico. Desaroyo sostenibel a ser defini como desaroyo cu ta cubri e necesidadnan di e presente sin compromete e abilidad di futuro generacionnan pa por cubri nan propio necesidadnan.
Pa logra esaki mester tin harmonia entre e aspecto humano, balansa den desaroyo economico y prosperidad, y tambe proteccion pa nos medio ambiente.

E Metanan di Desaroyo Sostenibel ta consisti di 17 meta riba cual paisnan ta traha pa alcansa den nan contexto nacional. E metanan ta: 
1.    Caba cu pobresa; 
2.    Caba cu hamber;
3.    Salud y bienestar; 
4.    Enseñansa di calidad: 
5.    Igualdad di genero; 
6.    Awa limpi;
7.    Energia limpi y economico; 
8.    Trabou decente y crecemento economico; 
9.    Innovacion y infrastructura; 
10.    Reduci desigualdad; 
11.    Barionan y comunidadnan sostenibel; 
12.    Produccion y consumo responsabel; 
13.    Accion riba clima; 
14.    Bida bou awa; 
15.    Bida riba tera; 
16.    Paz, husticia y institucionnan formalisa; 
17.    Partnership pa logra e metanan.