Presentacion di Plataforma TERENO Connect

Sr. Louis Boekhoudt di DLV a habri e presentacion cu un palabra di bon bini y a gradici tur stakeholders presente pa nan presencia. E la sigui na menciona con un plataforma pa maneho di tereno manera TERENO Connect lo trece automatisacion y innovacion na DLV y cu acceso na informacion cadastral lo simplifica e procedura di registracion.

Minister di Vivienda y Infrastructura, Sr. Baba Herdé na su turno tambe a yama tur hende bon bini, a expresa su gratitud pa e asistencia masal na e presentacion aki y a enfatisa e importancia di TERENO Connect y e impacto positivo cu un plataforma asina por trece no solamente pa DLV, pero pa Aruba henter.

Sr. Guershon Nahr di DataAxis a duna presentacion. DataAxis ta encarga cu e proceso di automatisacion, integracion digital y conformidad di e sectornan, pa asina modernisa e sistema den henter Caribe. Nan ta yuda gobierno y sector priva pa utilisa optimalmente nan data interno y genera entrada externo cu dicho data.

E meta di e presentacion tawata pa informa e stakeholders tocante e progreso di TERENO Connect y pa presenta e portal di comunicacion y intercambio di datonan. Alabes e encuentro a fungi pa ricibi feedback di e stakeholders pa e siguiente fase.
TERENO Connect ta un portal completamente digital y nobo, diseña pa modernisa y simplifica e acceso na informacion cadastral di DLV.

E Plataforma mester fungi como un punto di acceso pa interaccion cu DLV sigura y central pa duna stakeholders y clientenan e oportunidad pa haci un peticion digitalmente, pa asina limita y eventualmente elimina e procesonan manual, papeleo y bishita fisico.

Na final di e presentacion Minister Herdé a urgi e stakeholders presente pa duna nan feedback y pa comparti nan ideanan, pa asina sigui transforma e portal pa finalmente por introduci esaki mas pronto cu ta posibel.