Presentacion di “Leerorkest” na Renaissance Convention Center

Durante e evento, un total di 560 mucha di diferente scol basico a subi podium formando orkesta pa klas 3, 4, 5 y 6, mientras cu 60 mucha di e After School Orkest a completa e presentacion. E audiencia a keda sumamente impresiona cu e talento y dedicacion cu e muchanan a demostra riba instrumentonan manera violin, cello, percusion, y instrumentonan di brasa manera horn y trompet.

E culminacion di e evento tabata un presentacion musical di tres cancion, cu e ultimo cancion cu a inclui un presentacion en bibo di Aruba su gran leyenda, Ataniro.

Leerorkest Aruba a inicia na 2019 como un proyecto socio-comunitario, cu sosten financiero parcial di Leerorkest Hulanda, cu ta haya subsidio di Ministerio di Husticia di Hulanda y ta comparti esey cu Aruba.

Leerorkest Aruba tin como meta pa duna tur mucha riba nos isla e oportunidad pa siña toca un instrumento musical, durante y despues di scol. Muchanan ta siña toca hunto riba instrumentonan di orkesta real, den klas. Asina aki nan por siña traha musica hunto, y nan ta siña traha hunto, scucha otro, respeta otro y mas cu tur cos diberti hunto!

Prome Minister Mike Eman cu tabata presente na e presentacion a expresa su admiracion pa e esfuerso y dedicacion di e muchanan y nan maestro(a), y ta contento cu un programa cu ta haci realidad un desaroyo cultural y educativo integral pa e futuro di Aruba.

E muchanan a traha duro tur aña escolar pa desaroya nan habilidad musical, y e resultado ta un testimonio di kico ta posibel ora nos duna oportunidadnan igual pa tur mucha.