Presentacion di e resultadonan di e evaluacion di Utilities Aruba N.V. y Aruba Wastewater Sustainable Solutions (AWSS).
ORANJESTAD - Riba 26 di februari 2026 a tuma luga presentacion duna door di Joseph Everon, Director di Utilities Aruba N.V. cu tabata dirigi na miembronan di College Aruba Financieel Toezicht.
Minister di Husticia, Integracion, Transporte Publico y Energia, mr. drs. Arthur Dowers, tambe a asisti na e presentacion, unda e director a elabora riba e resultadonan di e evaluacion (doorlichting) haci recientemente na Utilities Aruba N.V. y Aruba Wastewater Sustainable Solutions (AWSS).
Durante e reunion, tambe a presenta e plannan basa riba e recomendacionnan cu a sali for di e doorlichting. E obhetivo ta cla: mitiga e deficiencianan identifica y pone un fundeshi structural pa e futuro, tanto pa AWSS como pa Utilities Aruba N.V.
Transparencia, bon gobernacion y responsabilidad financiero ta fundamental pa garantisa un sector di utilidad fuerte, sostenibel y confiabel. Gobierno tin un responsabilidad grandi pa cuida entidadnan vital ye fondonan di nos pais. E doorlichting ta apenas e inicio, pero ta un punto di salida pa fortifica e organisacionnan aki y sigura cu nan ta opera cu eficiencia, disciplina financiero y vision pa futuro.
E presentacion a duna un bista cla di e situacion actual di e entidadnan. Gobierno ta reitera su compromiso cu supervision serio, maneho responsabel y accion concreto pa sigura stabilidad a largo plaso den e sector di energia y tratamento di awa di riool di Aruba.
