Presentacion di buki ‘Y ami awo?’
ORANJESTAD – Biblioteca Nacional ta invita publico ta bon bini na e presentacion di un buki nobo pa mucha titula ‘Y ami awo?’ di escritora Rachelle Goedgedrag.
Esaki ta tuma lugar na Biblioteca Nacional Aruba, diabierna dia 11 di september 2026 pa 5or.
Rachelle Lue-Goedgedrag ta un autor Arubiano cu ta encanta skirbi storia cu ta laga e lesado drenta den un mundo yena di aventura, sinti diferente emocion y conecta cu e personahenan. Den su storianan, e ta combina su interes pa psicologia cu su amor pa nos idioma Papiamento, creando suspenso cu ta tene e lesado curioso pa sa kico lo pasa despues.
Su pasion pa skirbi a cuminsa door di hunga cu palabra y crea poesia, cu pocopoco a crece bira storia y despues novela. Den su storianan, e ta duna bida na emocion, relacion y situacionnan cu hende por reconoce. Su manera di skirbi ta facil y natural, cu dialogonan cu ta zona manera nos ta papia cu otro na Aruba.
Cu su prome buki, ‘Louella’, Rachelle a haci su prome paso den mundo literario na 2024. E novela a capta hopi atencion y a laga hopi lesado curioso pa mas. Despues a sigui Y ami awo?, su prome buki pa mucha, na 2026. Cu e buki aki, Rachelle kier pone enfasis riba importancia di cuida nos naturalesa y bestianan, y concientisa grandi y chikito di e rol cu nos tin den esaki.
Banda di ta autor, Rachelle ta docente di psicologia, Decano Central, PR y ta forma parti di International Affairs di Colegio EPI na Aruba. Tambe e ta fundador di ‘Fundacion Conecta y Briya’, cu ta crea oportunidad pa trece hende hunto pa medio di buki, proyectonan educativo, actividadnan social y competencia di puzzel.
Rachelle ta casa cu Naviel y ta mama orguyoso di tres yiu homber, Jaythro, Xavier y Gian, kende cu nan curiosidad, fantasia y manera di mira mundo ta sigui inspira su creatividad tur dia.