Pionero den turismo sr. Michael Kuiperi a ricibi Reconocemento di Excelencia
ORANJESTAD - Dia 15 di mei 2024, Minister di Finansa y Cultura sra. Xiomara Maduro, hunto cu Minister di Labor, Energia y Intergracion sr. Glenbert Croes, den nomber di Prome Minister Evelyn Wever-Croes, a ricibi un di e pioneronan den turismo di Aruba, sr. Michael Kuiperi, pa haci entrega di un Reconocemento di Excelencia di Gobierno di Aruba.
Sr. Michael Kuiperi tabata e prome director di Oficina di Turismo di Aruba y a percura pa traha un fundeshi solido pa desaroya e industria di turismo na Aruba. Danki na su vision, curashi, creatividad y trabou duro, Aruba a yega riba e mapa internacional como destino turistico. Sr. Kuiperi a percura pa, entre otro, e prome vuelonan di Merca pa Aruba via Puerto Rico y di e manera eynan a sa di pone e fundeshi pa e diferente vuelonan directo cu a sigui di Merca pa Aruba.
Sr. Kuiperi a traha duro pa pone Aruba su cultura, musica y nos artistanan local riba mapa internacional di turismo, pa di e manera aki haci e turista curioso pa bishita Aruba. Danki na e trabou pionero di conecta turismo y cultura di Aruba, awendia e turista cu ta bishita Aruba no ta bin solamente pa e "Sun, Sea, or Sand" pero ta mas interesa pa e "Soul" di Aruba cu ta e cultura di nos Pais.
Minister Maduro a dedica algun palabra di gratitud y brinda sr. Michael Kuiperi e reconocemento special aki di Gobierno di Aruba den presencia di Minister Glenbert Croes y nieto di sr. Kuiperi, sr. Micheal Leo van Rommondt.