Pensioen di behes (AOV)

Ley di pensioen di behes ta regla cu un persona tin derecho riba un pensioen di behes ora cu e yega 60 aña. Entrante 1 januari 2015 e edad di pensioen a subi pa 60,5 aña. E edad di pensioen a sigui subi cada aña cu 6 luna te cu 1 januari 2024 ora e edad di pensioen a bira 65 aña.

Por lo tanto, e edad cu cada persona tin derecho riba pensioen di behes a bira gradualmente:

• entrante 1 di januari 2015 : 60,5;
• entrante 1 di januari 2016 : 61;
• entrante 1 di januari 2017 : 61,5;
• entrante 1 di januari 2018 : 62;
• entrante 1 di januari 2019 : 62,5;
• entrante 1 di januari 2020 : 63;
• entrante 1 di januari 2021 : 63,5;
• entrante 1 di januari 2022 : 64;
• entrante 1 di januari 2023 : 64,5;
• entrante 1 di januari 2024 : 65.

E suma di pensioen ta depende di diferente factor, esakinan por ta:

• Estado civil (casa of no);
• Periodo cu e persona ta inscribi na Censo y Registro Civil.

Banco di Seguro Social ta encarga cu tratamento di peticion pa pensioen di behes y cu e pago. Pa por garantisa cu bo por cobra pensioen di behes na e momento cu bo cumpli e edad di pensioen, ta conseha pa acudi personalmente na Banco di Seguro Social (SVb), departamento di Pensioen, cuatro (4) luna prome cu cumpli e edad di pensioen.

 Na momento cu bo acudi na SVb, pa haci un peticion pa pensioen di behes, mester trece e siguiente documentonan:

• Un pasfoto;
• Number di cuenta di banco of un carnet di banco;
• Trouwboek (si bo ta casa)
• Cedula (obtenibel na Censo).

Un empleado di Departamento di Pensioen di SVb lo yuda bo na momento di yena e formulario pa haci peticion pa pensioen di behes. 

Cuanto ta e pensioen di biehes?

Pa un pareha casa of cu ta biba hunto, e pensioen di biehes maximo ta Afl. 2.182 pa luna of Afl. 1.091 pa persona.

Pa un persona soltero, e maximo di pensioen di biehes ta Afl. 1.296 pa luna.

Pa un persona casa cu no ta biba hunto of un persona no casa cu ta biba hunto, e pensioen di biehes maximo ta Afl. 1.091 pa luna.

Tur aña, un pensionado cu tin derecho riba un pensioen den luna di september ta haya un bonus di Pasco den luna di december. E bonus di Pasco ta 75% di locual e pensionado ta haya den luna di september y ta wordo paga hunto cu e pensioen di december.

E sumanan aki ta exclui e toeslag di reparacion.

Reparatietoeslag 

E toeslag di reparacion ta un compensacion cu gobierno di Aruba ta paga na e pensionadonan, pa medio di SVb (Banco di Seguro Social). E reparatietoeslag no ta forma parti di e AOV ( Pensioen di behes)Gobierno di Aruba a dicidi cu cada persona cu:

• ta registra na Registro Civil di Aruba;
• ta haya un pensioen di AOV/AWW for di SVb Aruba;

ta  otorga un reparatietoeslag mensual di Afl. 450.

Flex pensioen

A introduci flex pensioen pa pensioen di behes AOW entrante prome di januari 2012. Introduccion di Flexpensioen ta nifica cu un persona cu tin derecho riba pensioen di behes por pospone su derecho di haya pensioen, cada biaha cu 1(un) aña, te un maximo di 5 (cinco) aña. Durante e tempo cu ta pospone pensioen e derecho di pensioen di behes ta keda pospone.
Pa cada aña cu e pensionado haci uzo di e derecho aki, e suma di pensioen di behes ta aumenta cu 7%.
E persona cu tin derecho riba pensioen cu kier haci uzo di e edad di pensioen flexibel, mester entrega un peticion por escrito na SVb un luna prome cu e cumpli e edad pa derecho di pensioen, cu otro palabra, prome cu e periodo cu por pospone su pensioen caduca.

Nota: Entrante 1 januari 2015 e edad di pensioen flexibel tambe ta aumenta gradualmente te cu 65 aña na 2024.

Den e siguiente tabel por haya un resumen di un suma di pensioen mas halto si e persona cu tin derecho riba pensioen haci uzo di e posibilidad di pospone su pensioen. 

Den e articulo nobo 8a di e Landsverordening algemene ouderdomsverzekering tin mas informacion riba flex pensioen.

Mas informashon
Pa mas informacion por tuma contacto cu Departamento di Pensioen:

via WhatsApp na 527-2760 (mensahenan so, yamadanan di telefon no ta posibel)
via email na pensioenen@svbaruba.org 
por telefon na 527-2760
via e formulario di contacto

Departamento di Pensioen ta habri di dialuna pa diabierna di 8:00 AM pa 12:00 PM y di 1:00 PM pa 3:00 PM.