Parlamento di Aruba a aproba ley di privatisacion di RWZI

E ley aki ta trata e privatisacion di e 3 facilidadnan di RWZI (Rioolwaterzuiveringsinstallatie) na Bubali, Parkietenbos y Zeewijk, y e incinerator na Parkietenbos cu awor lo bay den man di Aruba Wastewater Sustainable Solutions NV. Cu 11 voto pro y 7 contra, Parlamento di Aruba a aproba e ley di e privatisacion di RWZI.

E problema di RWZI ta un reto di hopi aña debi na e crecemento acelera den turismo. Desaroyo di condominio y hotelnan nobo den transcurso di añanan, a percura pa crecemento den cantidad di bishitante cu a surpasa e capacidad di desperdicio di riolering cu por procesa na e facilidadnan aki. Cu e privatisacion aki, pronto e problema aki ta pa pasado.

Gobierno, despues di a sondia varios posibilidad pa mehora e facilidadnan di RWZI, cu un situacion financiero limita, a opta pa privatisa RWZI. A forma un stuurgroep lidera pa sr. Jossy Figaroa cu a consisti di representantenan di e tres ministerionan: Ministerio di Transporte, Integridad, Naturalesa y Asunto di Adulto Mayor, Ministerio di Labor, Energia y Integracion y Ministerio di Asunto General, Innovacion, Organisacion Gubernamental, Infrastructura y Planificacion Teritorial, unda DOW tawatin un rol hopi importante. Tambe Directie Wetgeving en Juridische Zaken a forma parti di e stuurgroep pa locual ta trata e ley.