Parlamento a aproba ley pa introduci “salario minimo pa ora”

Minister di Turismo, Labor y Transporte, mr. Wendrick Cicilia tabata presente den Parlamento di Aruba pa trata e ley di salario mínimo (minimumuurloon).   

E ley di ‘minimumuurloon’  ta introduci un mecanismo nobo pa calcula salario minimo lo ta di beneficio pa mas cu 9000 empleado cu na e momentonan aki no tin un compensacion husto pa cada ora cu nan ta eherce labor. Esnan cu lo beneficia di ley aki ta esnan cu ta labora den e sector di hospitalidad, horeca y turismo.

Minister Cicilia a indica cu e mecanismo nobo lo percura pa haci husticia na mas cu 30% di nos forsa laboral. Gobierno ta reconoce cu mester utilisa diferente instrumentonan pa eleva capacidad di inversion y experiencia di bida di nos comunidad. Pa e motibo aki ta haci uzo di tur instrumento manera e adaptacion di ley di salario minimo pa mehora e capacidad di compra di nos comunidad.

Manera nobo pa calcula salario minimo basa riba un tarifa pa ora

E manera di calcula ta data desde aña 1972. Ta calcula e salario minimo a base di e NAD “normale arbeidsduur”.  E NAD ta depende di e sector. Tin sector cu ta mantene 40 ora pa siman of entre 42 te cu 46 ora pa siman. Aunke tin diferencia den ora di trabou pa siman pa motibo di e mecanismo di calculo no tin un diferencia den compensacion fin di luna.

E motibo ta e mecanismo legal den ley di salario minimo pa calcula e salario pa luna. E mecanismo ta calcula a base di tarifa pa luna of siman  manteniendo un siman trabou na 40 ora pa siman.  E ley ta stipula un salario fiho pa luna of pa siman cu ta forma base pa e calculacion . E salario pa siman ta traduci den un salario minimo pa luna cu un factor di intercambio di 4.28. Esaki ta situacion anterior cu tabata causa inhusticia cu un empleado cu ta traha 40 ora pa siman ta ricibi e mesun salario cu un empleado cu ta traha 42,44 of 45 ora pa siman.

Beneficio amplio

Cu introduccion di e ley di “minimumuurloon” ta introduci un mecanismo di calculo di salario minimo a base di un tarifa pa ora pa labor efectual. Ta propone un salario minimo pa ora di 11.58 proponi pa calcula e salario minimo pa siman y na momento ta bay haci e calculo pa luna, e factor di transformacion ta bira 4.333.

E empleadonan cu ta traha 42 ora pa siman ta bay dilanti cu 121 florin pa luna, esnan cu ta traha 44 ora pa siman ta bay dilanti cu 221 florin pa luna y esnan cu ta traha 45 ora pa siman ta bay dilanti cu 271 florin.

Aumento di salario minimo

• Empleadonan cu ta traha 42 ora pa siman lo ricibi un aumento di 121 florin pa luna.
• Empleadonan cu ta traha 44 ora pa siman lo ricibi un aumento di 221 florin pa luna.
• Empleadonan cu ta traha 45 ora pa siman lo ricibi un aumento di 271 florin pa luna.