Pa un comunidad harmonioso, un doño di mascota responsabel alabes!
ORANJESTAD - Luna pasa a anuncia cu Gobierno di Aruba, pa medio di Ministerio di Salud, Cuido di Adulto Mayor y Adiccion, hunto cu Directie Volksgezondheid (DVG) ta den preparacionnan pa un maneho nobo na bienestar di animal y comunidad henter.
E maneho lo enfoca riba promove responsabilidad, pa preveni abandono di animalnan riba caya, y pa hunto nos crea un Aruba mas sigur pa hende y animal.
Awe nos kier para keto riba un di e aspectonan mas importante di e maneho cu ta e nificacion di un doño di mascota responsabel.
Ken ta un Doño Responsabel?
Compromiso pa Bida Largo: Un doño responsabel ta e persona cu ora e dicidi di bira doño di un mascota, e sa cu hunto cu esey e ta acepta mesora e responsabilidad pa e mascota ey y pa cualke yiu cu e produci. E responsabilidad ey ta keda riba e persona aki pa semper of te dia e haya un doño nobo p’e.
Salud y Control: E doño responsabel ta percura pa respeta e bienestar di e mascota, incluso su necesidadnan di comportacion. Tambe e ta percura cu e mascota ta proteha mas miho cu e por contra malesanan contagioso (por ehempel door di laga vacuna su mascota) y contra reproduccion indesea (por ehempel door di castra/sterilisa su mascota).
Identificacion: E doño responsabel ta percura pa tur hende sa cu su mascota tin un doño. E ta percura pa por identifica e mascota, por ehempel bistiendo e un banchi of pa identificacion permanente cu un microchip. E doño responsabel lo percura pa registra e microchip den un base di dato y cu e informacion keda semper up to date, pa si un dia, pa mala suerte, e mascota perde y ora un otro hende hay’e, e por bay cu ne na un dokter di bestia pa haya sa ken ta su doño.
Siguridad: E doño responsabel ta percura pa tuma tur paso rasonabel pa garantisa cu su mascota no ta riba caya sin control, cu por causa un problema pa e comunidad, medio ambiente y/of un peliger pa su mes.
E campaña #NoMasSufrimento, #MasDoñoResponsabel ta invita tur ciudadano pa forma parti di e cambio. E solucion di e problema aki no ta depende solamente di ley y Gobierno, pero tambe di e compromiso y responsabilidad di cada ciudadano cu ta biba riba Aruba.
Sea abo tambe un doño di mascota responsabel. Cada acto di responsabilidad ta salba un bida. Planta amor, brinda speransa y proteha bienestar di nos animalnan!
