Organisacion cu ta traha cu adulto mayor ta uni su bos na e Common Good Conference

Entre nan tin Directie Ouderenzaken cu ta un organisacion gubernamental cu ta enfoca riba bienestar di adulto mayor, cu ta traha activamente pa aborda asuntonan relevante cu ta afecta e generacion di mas edad riba nos isla. Nan mision ta pa centralisa un sistema di cuido integral, cu servicio tanto pa cuido formal como informal, y pa asegura cu nos adultonan mayor ta haña e atencion y respet cu nan merece.

Segun directora di Directie Ouderenzaken. Desiree Helder, e participacion den e conferencia ta un oportunidad importante pa crea mas conscientisacion riba loke nan ta haci pa promove bienestar general di adulto mayor, tanto den area social, cultural como di cuido y dignidad.

“Nos ta participa den e Common Good Conference pa duna mas informacion riba loke nos ta haci pa bienestar general di adulto mayor na Aruba,” ela indica.

E organisacion ta spera cu e conferencia lo sirbi como un plataforma pa conecta cu otro organisacion y instancia, pa fortalece comunicacion, crea relacion nobo y amplia colaboracion riba e tereno di common good. Segun nan, ora organisacionnan ta bin hunto, ta posibel logra un miho comprension di e reto cu e sociedad ta enfrenta y busca solucionnan cu ta beneficia tur hende.

E enfoke riba adulto mayor ta esencial pa un desaroyo social balansa, y e organisacion ta kere cu e Common Good Conference por contribui na un miho entendimento di con e cuido y integracion di adulto mayor ta forma parti di un sociedad sano y solidario.

E invitacion ta pa e comunidad participa activamente na e conferencia y expo, pa asina forma parti di e dialogo y contribui na un futuro unda bienestar, respet y dignidad ta central pa tur generacion riba Aruba.