Opendag SVb Aruba en conexion cu celebracion di 65 Aña di AOV: Goso di Seguridad Financiero pa nos Grandinan

Durante tur e añanan, AOV a sirbi como un fondo esencial cu a brinda seguridad y stabilidad pa hopi generacion di grandinan.

E celebracion tabata un opendag na oficina di SVb Vondellaan, caminda bishitantenan por a haya informacion di Pensioen (con pa aplica, con pa traha cu e app di MiPensioen, calculador di pensioen), tambe tur informacion tocante AOV (haya number di AOV), guia pa uzo di Kiosko, y finalmente por a midi presion, sucu y colesterol.

Un parti importante di e celebracion tabata e reconocimento di tres ex-empleadonan di SVb pa nan añanan di dedicacion y servicio den departamento di pensioen:

• Sra. Raquelina Croes
• Sr. Julius Rustveld
• Sra. Myna Abath

Minister di Salud Publico, Asunto Social, Cuido di Adulto Mayor y Maneho di Adiccion, Mervin Wyatt-Ras, tabata presente na e celebracion y a expresa su aprecio pa e trabou incansabel di SVb, y e importancia di AOV pa proteha e bienestar di nos grandinan.

“AOV ta un pilar den nos sistema di seguridad social. Su 65 aña ta testimonio di un compromiso continuo pa brinda seguridad y stabilidad financiero na nos grandinan,” asina Minister Wyatt-Ras a bisa.

Minister Wyatt-Ras a reafirma compromiso di su ministerio pa traha pa husticia social, sosten y bienestar di nos grandinan. El a subraya cu AOV, hunto cu otro medida social, ta keda fundamental pa garantisa un futuro digno y sigur pa nos pueblo.