NVWA na Aruba pa inventarisa siguridad di alimento!

Durante e bishita aki, drs. Gabor van der Straten ta actua como representante di NVWA. E inventarisacion tawata enfoca principalmente riba produccion y importacion di carni, y productonan di carni, como tambe parcialmente riba pisca y webo.

Siguridad di fruta y berdura no ta forma parti di e inventarisacion aki.

E proposito di e inventarisacion no tawata un inspeccion, pero un bista di e funcionamento di e sistema na e momento. E enfoke tawata riba e structura y funcionamento di e sistema, y no riba persona. 

Crea cooperacion y transparencia ta esencial durante tur e proceso aki pa por crea un bon bista di e realidad.

Durante e inventarisacion a evalua:

• E leynan y regulacionnan vigente na Aruba, kico tin y unda tin buraco.
• Con Aruba ta maneha carni den practica, desde produccion y importacion te na benta.
• Kico ta cana bon y den cual area tin espacio pa mehoracion.
• Unda tin riesgo potencial pa siguridad di alimento.

E producto final di e proceso aki lo ta un raport di inventarisacion cu un evaluacion di e situacion actual di siguridad di alimento riba carni y productonan di carni na Aruba, cu recomendacionnan concreto pa fortalece leynan y supervision y crea colaboracion entre partnernan relevante.

Cu e bishita aki, DVG ta reforsa su compromiso cu transparencia y mehoramiento continuo, cu e meta pa fortalece confiansa di comunidad den e sistema cu ta proteha nan salud. Door di ehece nos servicio y controlnan pa medio di nos Seccionan Dienst Warenkeuring en Hygiene y Veterinaire dienst, DVG ta traha diariamente pa brinda siguridad, trankilidad y contribui na bienestar y felicidad general di nos comunidad.

...pasobra bo salud ta nos prioridad!

Pa keda semper bon informa:

• Like Facebook page Directie Volksgezondheid DVG Aruba
• Follow DVG riba Instagram directie_volksgezondheid_aruba
• Subi www.dvg.aw
• Yama  na 5224200
• Mail  na servicio@dvg.aw