Nuebe studiante di Aruba a ricibi Beca di Reino

Entrante 1 di september proximo e studiantenan lo cuminsa cu nan intercambio di estudio of pasantia na un di e paisnan den Reino Hulandes. Na januari 2023, Minister di Enseñansa di Hulanda sr. Robbert Dijkgraff, durante un bishita na Aruba, a anuncia e proyecto di Beca di Reino den cuadro di e programa di mobilidad (mobiliteitsprogramma) pa studiante.

E intercambio aki ta brinda e studiantenan di EPI y Universidad di Aruba e oportunidad pa haci nan pasantia of intercambio di estudio di seis (6) luna na Hulanda y dunando e studiante e oportunidad pa experencia si nan gusta Hulanda pa continua cu nan estudio. E Beca di Reino ta un programa di mobilidad pa tur studiante den Reino Hulandes y ta diseña pa haci posibel e intercambio di studiante pa un tempo cortico, pa aumenta e porcentahe di studiantenan den termina nan estudio cu exito. E meta ta pa pa evita dropout y desapunto na momento cu e studiante scoge pa haci un estudio completo den exterior.

Despues di tur e trabounan realisa, 9 studiante di Aruba, di cual 8 di EPI y 1 di Universidad di Aruba, a ricibi e Beca di Reino pa bay Hulanda cu tur gasto paga. Otro aña lo tin 120 cupo disponibel entre Corsou, Sint Maarten y Aruba pa e proyecto aki. 
Ta urgi e studiantenan di IPA, EPI y Universidad di Aruba pa aplica na tempo pa e Beca di Reino pa por bin na remarke pa e proximo grupo.

Mas informacion por haya riba e website: 

https://www.rijksdienstcn.com/onderwijs-cultuur-wetenschap/koninkrijksbeurs