Nacionnan Uni a duna presentacion di SDG's den Conseho di Minister

Durante di e presentacion, e ministernan a haya un splicacion con a yega na e SDG’s, con leu Aruba ta riba e proceso di conscientisacion y kico mas Aruba lo mester haci pa por alcansa e metanan aki.
Nacionnan uni a contrata sra. Pytrik Dieuwke Oosterhof, consultant di UN ECLAC, pa duna e presentacion na Conseho di Minister. Oosterhof, entre otro, a traha un strategia di comunicacion specialmente pa Aruba den cual ta indica e pasonan pa tuma tanto den gobierno, sector priva, instancianan gubernamental y no gubernamental. Oosterhof a señala cu e unico forma di alcansa e metanan di e SDG ta pa traha hunto pa crea conscientisacion. E interconexion entre e diferente SDG ta crea e efecto acelera pa logra e Metanan Mundial pa Desaroyo pa aña 2030. Segun Oosterhof, Aruba inconscientemente ta haciendo hopi caba pa logra e metanan aki, pero cu falta comunicacion y coneccion riba tur e esfuersonan (maneho, proceduranan, leynan, iniciativanan) na e SDG.

Conseho di Minister a keda entusiasma cu e presentacion di e strategia di comunicacion pa crea conscientisacion riba e SDG's di Nacionnan Uni 2030, y a compromete pa implementa e strategia pa contribui na conscientisa comunidad tocante e metanan aki.