Musica di Michael Lampe ta zona den prestigioso Battery Dance Festival na New York
ORANJESTAD – Compositor, productor y artista multidisciplinario y Embahador Cultural di Aruba, Michael Lampe, lo tin su musica presenta den e prestigiado Battery Dance Festival na New York City, como parti di un choreografia di choreographer di Curaçao Faizah Grootens.
E festival, cu ta tuma lugá for di 10 pa 16 di augustus 2025, ta un di e eventonan cultural di temporada aki mas importante den New York, cu ta atrae miles di hende y un audiencia global via streaming. E seleccion di e obra di Faizah, acompaña cu musica original di Michael Lampe, ta un paso importante pa representacion di talento di Caribe den un escenario internacional tan reconoci.
Tocante e obra
E choreografia di Faizah Grootens ta un exploracion di identidad, memoria y movimiento, cu e a integra cu un composicion musical di Michael Lampe. E musica ta fusiona di ritmonan di Caribe cu texturanan electronico toca cu instrumentonan classico, creando un dialogo profundo entre movimiento y sonido.
Michael Lampe tocante e colaboracion:
“Ta un gran honor di traha cu Faizah y pa nos trabounan Caribeño ta briya na un festival di taya mundial. E ta mas cu un presentacion – e ta un acto di representacion cultural y un brug pa nos historia y creatividad.” Momentonan asina ta habri caminda pa mas di nos talentonan di Aruba y Caribe tambe haya oportunidadnan internacional. Esaki ta algo cu mi ta lucha pe incansablemente.
E presentacion lo tuma lugá di 12 pa 16 di augustus na Rockefeller Park NYC y lo ta transmití online pa un publico global www.batterydance.org/battery-dance-festival
Tocante Michael Lampe
Michael Lampe a studia Hogeschool voor de Kunsten Utrecht y recientemente a gradua cu un Executive diploma di United Nations riba tereno di Diplomacia Cultural, Lampe ta un compositor, productor y artista multidisciplinario di Aruba, activo tambe bou di nombernan Fellow y Datapanik, cu su obranan musical e ta crea brug entre diferente generacion cu mescla di musica electronico, influencia di folklore di Aruba y Caribe, tecnologia y investigacion di herencia cultural. Den pasado a toka na varios pais y festivals. Lampe ta tambe Ambassador y Diplomatico Cultural di Aruba cu base na Hulanda, e ta dedica na crea oportunidanan international pa nos talentonan di Aruba.