Mosher ta drenta na funcion como Director nobo di Free Zone Aruba N.V.
ORANJESTAD - Ministerio di Finansa, Asunto Economico y Sector Primario, den su calidad di representante di Land Aruba como unico accionista di Free Zone Aruba N.V. (FZA), ta anuncia cu Sr. Walter E. Mosher a inicia oficialmente como Director nobo di FZA, dialuna dia 2 di februari 2026.
E nombramento aki ta representa un paso importante den e proceso continuo di fortalecemento institucional y modernisacion operacional di Free Zone Aruba, un entidad cu ta hunga un rol strategico den e diversificacion economico y posicionamento internacional di Aruba.
Señor Mosher ta un profesional Arubiano cu amplia experencia den sector privado, den ambito academico y den un contexto internacional. Su decision di bolbe Aruba ta refleha un eleccion consciente pa contribui activamente na desaroyo economico y institucional di si pais.
Segun Minister di Finansa, Asunto Economico y Sector Primario Geoffrey Wever:
“Mi ta sumamente contento cu Sr. Walter Mosher a haci su mes disponibel pa lidera Free Zone Aruba den e era nobo. Mi tin pleno confiansa den su profesionalismo y experticio.”
E nombramento di Sr. Mosher ta resultado di un proceso di seleccion riguroso, ehecuta door di e Hunta di Comisario di FZA den consulta cu e ministro den su capacidad como representante di e accionista Land Aruba.
E ministro tambe a expresa su aprecio pa e Hunta di Comisario pa nan liderazgo durante un periodo importante di transicion, y a destaca cu e restructuracion institucional reciente y planificacion strategico a crea un base solido pa maneho transparente y eficiente y crecemento futuro.
Cu e nombramento di señor Mosher, Free Zone Aruba ta drenta un fase nobo, enfoca riba modernisacion, fortalecemento di su posicion competitivo y stimulacion di desaroyo economico sostenibel.