Ministro di Finansa a reuni cu CAFT
ORANJESTAD – Recientemente, Minister di Finansa, Adunto Economico y Sector Primario, mr. Geoffrey Wever, a tene su prome reunion oficial cu College Aruba Financieel Toezicht (CAft).
Durante e reunion a papia riba e temanan di, entre otro, e trayectoria di con y dicon a bin cu un e nota di cambio riba e presupuesto 2025 y tambe a dialoga riba e preparacion andando pa presupuesto 2026.
Gabinete AVP- FUTURO su plan di gobernacion ta un plan integral cu tin como punto di salida cu tur hende mester beneficia di e desaroyo economico y un reparticion husto di e recursonan di nos pais. P'esey e gabinete nobo a entrega un nota di cambio pa asina pensionadonan haya 250 florin extra pa luna desde 1 di mei y baha e accijns riba gasolin y diesel, tambe entrante 1 di mei 2025. E nota di cambio aki, riba e mesun dia cu gabinete a huramenta, tabata necesario pa inmediatamente duna bek desde 1 di mei enbes di 1 di juni. Dia 2 di april, conforme ley, Minister di Finansa a manda e presupuesto 2025 aproba unanimamente pa Parlamento di Aruba pa conseho di CAft.
Durante e reunion cu CAft, Minister Geoffrey Wever a enfatisa cu e maneho pa finansa publico ta uno duradero y ta un refleho di e maneho di Gobierno pa drecha entre otro poder di compra, baha costo di bida y duna siguransa na inversionistanan local y internacional di un maneho financiero prudente y transparente manera palabra den e Programa di Gobernacion 2025- 2028.
Punto di salida di ministerio di Finansa y lo keda un bon cooperacion entre CAft y Pais Aruba pa hunto logra banda di finansa duradero y prudente, keda mantene e balans continuamente pa tur hende beneficia di e desaroyo di nos pais.