Ministernan Endy Croes y Geoffrey Wever a firma MOU cu Stenden University
ORANJESTAD - Dialuna 11 di maart 2024 tabata tin un encuentro entre representantenan di Stenden University hunto cu minister di Educacion y Deporte Endy Croes y Minister di Asunto Economico, Comunicacion y Desaroyo Sostenibel, Geoffrey Wever.
E Ministerio di Asuntonan Economico y e Ministerio di Educacion a uni forsa cu e universidad pa lansa un programa di intercambio di studiante universitario for di Hulanda. E Memorandum di Entendemento (MoU), ta traha e caminda pa studiantenan di Stenden University bin biba y studia na Aruba.
"Nos ta buscando pa duna mas bida na nos centro di ciudad, y cu un intercambio di studiantenan manera esun aki, nos centro ta bira un luga unda educacion y diferente cultura ta encontra y convivi," Minister Geoffrey Wever a menciona, sperando cu esaki lo yuda mas aun trece mas movecion y energia den curason di Oranjestad.
Gobierno di Aruba recientemente a inicia e proceso pa transforma e ex-edificio di Ministerio Publico (OM) den Oranjestad den un compleho di apartamento pa studiante, como parti di diferente iniciativanan di Ministerio di Asunto Economico pa revitalisa e centro di Oranjestad. Parti di e vision ta pa mas hende cuminsa biba den centro di Oranjestad y pa renoba e edificionan bandona, especialmente cu destino pa studiante.