Ministerio di Sector Primario ta dialoga cu miembronan di United Farmers of Aruba Association

UFA ta un asociacion cu ta representa e interesnan di e agricultornan riba e isla di Aruba y ta enfoca riba mehoracion di e forma cu ta planta, aumenta produccion di cuminda local,desaroya y haci uzo di metodo di agricultura sostenibel.

Minister Wever a dialoga cu e miembronan di UFA riba diferente topiconan,entre otro e conferencia di Dutch Caribbean Agriculture Livestock and Fisheries (DCALFA) a cu a tuma lugar fin di luna di mei na Sint-Maarten, a intercambia idea y contesta pregunta relaciona cu e CariFoodFund, cu ainda mester cuminsa cune, e Agri-Innovation Park (AIP) y obstaculonan cu e agricultornan ta enfrentando.

CariFoodFundta e instrumeno financiero diseña door di Ministerio di Asuntonan Interior y Relacion di Reino di Hulanda, a base di dos método cu ta stimula y fortalece e sistema di cuminda riba e islanan di Reino:

• Via e prome metodo e fondo ta stimula agricultornan, piscadonan y empresarionan activo den agricultura via un fondo rotativo directamente, cu tin 18 miyon euro disponibel;
• via e segundo metodo, cu tin 6 miyon disponibel, ta duna subsidio y contribucion na e gobierno local di e islanan cu ta dirigi na sostene iniciativanan riba tereno di siguridad di cuminda. 

Minister Wever a urgi e agricultornan pa duna feedback na e organisacion di CariFoodFund pa e structura di e instrumento financiero bira un cu realmente ta yuda den e operacionnan empresarial. Ademas, na Aruba tin e Agri-Business Academy programa cu tin fondo di Gobierno di Aruba ainda disponibel.

Minister Wever tambe a duna un update tocante e Agri-Innovation Park cu ta e proyecto cu lo bin cu e prome kassensysteem moderno den Caribe cu sosten di Gobierno di Aruba. E Agri-Innovation Park ta duna e oportunidad pa agricultornan local pa expande y fortifica nan produccion di fruta y berdura y ta reduci dependencia di Aruba pa importa cierto producto. 

Gobierno di Aruba ta inverti pa amplia e uzo y accesibilidad pa tecnologia moderno den sector primario y e AIP ta inclui:

• Un fuente di energia solar, un sistema pa almacena awa;
• instalacion di fertigacion (tecnica di agricultura unda ta inyecta directamente den un sistema di irigacion, fertilisante cu ta disolve den awa);
• un sistema di clima cu ta resistente na cambio di clima hunto cu un centro di conocemento pa training y estudio. 

Minister Wever a informa cu e estudionan di diseño tecnico y factibilidad economico a keda cla y cu gobierno ta evaluando e tereno di refineria pa construi e AIP. E construccion di AIP ta tene cuenta cu tur ley y regla vigente incluyendo un evaluacion di impacto ambiental.