Ministerio di Educacion y IPA ta organisa ‘Siman di Capacitacion Enseñansa Multilingual’ cu prof. dr. Joana Duarte

E siman di capacitacion aki ta marca e prome fase di un trayecto di profesionalisacion di varios aña, diseña pa eleva y reforsa e calidad di enseñansa den nos contexto multilingual. E obhetivo principal ta pa amplia e conocemento y habilidadnan practico di nos educadornan riba tereno di didactica di siñamento multilingual, translanguaging y e uzo strategico di e idioma materno den e proceso di siñamento.

Programa y Actividad

E programa di e siman di capacitacion a cuminsa dialuna 19 di october 2026 cu e Mini-conferencia titula ‘Strategianan di enseñansa multilingual’, cu a tuma luga di 14:00 pa 17:00 pm na Renaissance Convention Center. E sesion aki tabata dedica na cabesante di scol, maestro, directivana di scol y tur profesional envolvi den enseñansa di kleuter y basico.

Posteriormente, di diamars 20 pa diahuebs 22 di october 2026, a organisa e dianan di estudio pa maestronan di klas 1, 2 y 3, di 08:00 te cu 15:00 or. E prome dia di estudio, diamars 20 di october, a tuma luga na Instituto Pedagogico Arubano (IPA), mientras cu riba diaranson 21 y diahuebs 22 di october, e sesionnan a traslada pa e restaurant di Colegio EPI. E programa ta conta cu e siguiente topico di capacitacion;

• Tur idioma, un fiesta! - E workshop aki ta enfoca riba con e tecnica di translanguaging (e uzo flexibel y natural di Papiamento, Hulandes, Spaño y Ingles) por yuda amplia e vocabulario di nos alumnonan uzando wega y tema cu ta activamente mara na e mundo rond di nan.
• Lesa, conta y siña den mas cu un idioma - Den e workshop interactivo aki, e participantenan ta participa na un actividad di matematica cu ta haci uzo di translanguaging. Tambe nan lo descubri con pa reconoce texto y con pa uza nan den nan propio lesnan.
• Alumnonan den e rol principal multilingual - Den e tayer aki, educadornan lo experiencia un tarea di idioma interactivo y cu sentido den forma di un rollenspel, enfoca riba e habilidad di papia y di haci conversacion. Lo explora e diferente maneranan pa aplica translanguaging y traduci e experiencia aki directamente pa un metodologia aplicabel den nan propio klas.

Ministerio di Educacion ta extende gratitud y reconocemento na Instituto Pedagogico Arubano (IPA), y e ekipo organisador pa nan gran esfuerso y dedicacion den realisa e siman di capacitacion aki. E capacitacion aki ta un oportunidad valioso pa adkiri herment practico cu lo enrikece e proceso di siñamento di nos muchanan, y pa asina hunto sigui construi un futuro di excelencia pa e enseñansa multilingual na Aruba. 

Pa keda altanto di e oferta di profesionalisacion ta invita tur hende pa bishita regularmente www.learningcitiesaruba.org.