Ministerio di Educacion ta tuma un paso importante den digitalisacion educativo cu implementacion di plataforma KeDo
ORANJESTAD – Den un esfuerso continuo pa innova y fortalece e sistema educativo di nos isla, Ministerio di Educacion y e veld di enseñansa a tuma un paso sumamente importante siman pasa.
Cu hopi entusiasmo a duna inicio na e introduccion di e plataforma digital nobo conoci como KeDo.
E presentacion oficial, cual tabata bou di encargo di trahadonan social di scolnan publico, a conta cu e presencia y participacion activo di e Minister di Relacionnan den Reino, Enseñansa, Hubentud, Innovacion y Deporte, Gerlien Croes, kende a bishita e sesionnan pa asina mustra cu Aruba tambe lo bay uza e plataforma avansa aki pa beneficia nos comunidad escolar.
Un herment pa monitor y sostene nos alumnonan
KeDo, cu su nomber ta bin di e termino Hulandes 'KetenDossier', ta un aplicacion modular di internet desaroya pa e compania Xlab Cloud Services. KeDo ta dirigi su mes specíficamente riba e area caminda e mundo social-emocional di e mucha y e scol ta uni.
E obhetivo principal di e plataforma aki ta pa:
- Registra, comparti y monitor e desaroyo di e alumnonan dentro di e dominio social.
- Brinda e oportunidad pa sostene e desaroyo social-emocional di e studiantenan.
- Sirbi como un contacto directo y colectivo entre scol, famia y profesionalnan di ayudo ora un alumno tin mester di extra apoyo.
E introduccion di e plataforma digital aki ta habri e caminda pa crea mas unificacion den e desaroyo di cada alumno, y tambe e lo ofrece educadornan, trahadonan social y scolnan un sitio central pa nan por evalua y comunica tocante e necesidadnan di cada alumno. Ta importante pa enfatisa cu Multidisciplinair Centrum tambe a implementa e uzo di e plataforma KeDo y cu Bureau Leerplicht tambe ta den fase di preparacion pa implementacion pa tur informacion por ta centralisa y accesibel.
Na Hulanda, KeDo ta un plataforma ampliamente utilisa door di diferente municipionan, instancianan di cuido hubenil y den trabao pa hobennan. Su gran balor ta presidi den e metodo unifica, locual ta sigura cu tur esunnan involucra ta riba e mesun liña pa brinda e miho cuido y guia posibel.
Durante e introduccion, Minister Gerlien Croes a dirigi palabra di apoyo y un sosten sostenibel na tur e profesionalnan y educadornan cu a cuminsa siña traha cu KeDo, destacando e importancia di e digitalisacion aki pa un miho futuro pa e alumnonan di Aruba.