Ministerio di Adulto Mayor ta anuncia Proyecto di Cuido; Pasadia
ORANJESTAD - Pasadia ta e nomber di e facilidadnan unda cu adultonan mayor di 60+ por bin pasa nan dia y disfruta di un ambiente social y activo for di oranan di mainta te cu final di atardi.
E iniciativa aki ta nace pa falta di capacidad di cuido pa adulto mayor ariba nos isla. Esaki ta haci cu hopi persona di e tercera edad y nan famia ta confronta cu retonan grandi. Deterioro fisico y mental, dificultad financiero y stress psicologico ta algun di e effectonan cu ta observa den nos comunidad door falta di cuido adecua.
Pasadia lo ta un gran alivio na nos sistema di cuido, atendiendo un grupo grandi riba lista di espera di SABA y den futuro pa adulto mayor cu kier mantene nan mes fisica- y socialmente activo.
Durante e segundo edicion di Foro Nacional pa Adulto Mayor, Minister di Adulto Mayor, Ursell Arends a anuncia cu a firma un Intentieverklaring cu various stakeholder local pa haci Proyecto Pasadia un realidad. SABA, FCCA, Cas Marie, Buurtzorg Caribbean a haci espacio disponibel pa e proyecto y ta mustra entusiasma pa traha hunto riba esaki. Club Kibrahacha lo hunga un rol y tambe Wit Gele Kruis (WGK), cual ta ofrece chekeo medico.
Un parti clave den e vision pa Adultonan Mayor ta e principio pa elimina e necesidad di medicamento, un cambio pa un manera mas humano y social den nos interaccionnan cu adultonan mayor y nan cuido. E vision aki ta subraya e esencia di trata adultonan mayor cu e dignidad y compasion cu nan merece.
