Minister di Salud Publico impresiona cu trabao di FAVI
ORANJESTAD - Den cuadro di su compromiso continuo pa fortalece e sector di cuido y salud den nos comunidad, Minister di Salud Publico drs. Mervin Wyatt-Ras a realisa un bishita di trabao na Fundacion Arubano pa esnan Visualmente Incapacita (FAVI).
FAVI ta un institucion cu ta dedica na defende e dignidad y autonomia di hendenan cu ta ciego of tin un limitacion visual.
Durante e bishita diamars ultimo, directora di FAVI, sra. Cetty Baarh, a duna e mandatario un presentacion detaya riba e trabao diario y e impacto social cu FAVI tin riba e bida di mas cu 450 cliente, incluyendo algun cu ta haya sosten continuo desde 1974.
Na 1974, FAVI a nace como "Stichting Blindenzorg Aruba" y na 1975 a adopta e nomber actual pa conecta mas miho cu e comunidad, y ta sirbi como un pilar esencial pa e comunidad di hendenan visualmente incapacita. E meta di FAVI ta: mehora e independencia personal, promove inclusion social, y aumenta conscientisacion den sociedad Arubano riba e tema di incapacidad visual.
Actualmente FAVI ta conta cu dos maestra cu ta ofrece enseñansa ambulante adapta na hobennan cu incapacidad visual, hunto cu un ekipo di ondersteuners y dos trahado social cu ta brinda sosten na cas. Tur esaki apesar di e recurso limita, pero cu dedicacion di e personal.
E bishita ta subraya e vision di e Ministerio pa traha den colaboracion cu organisacionnan no gubernamental, pa garantisa cu ningun ciudadano ta keda atras, sin importa su condicion fisico.