Minister di Husticia di Corsou na Aruba pa presentacion di Operation Command Center

Cuerpo Policial, Bossi, Setar y Elmar a duna un presentacion amplio di henter e proyecto di Operation Command Center.

Na 2022, a inicia cu e proyecto aki cu ta consisti di diferente fase, di cual ya tin alrededor di 300 camara instala na sitionan strategico manera e area hotelero, binnenstad di San Nicolas, wardanan di polis y 40 otro sitio rond di Aruba. Mientrastanto ta instalando camara den centro di ciudad y lo sigui amplia esaki.

Ademas di e proyecto di camara, a comparti e procesonan nobo cu lo introduci den cuadro di reorganisacion di Cuerpo Policial, cu lo conta cu un centrale meldkamer, “call takers”, “dispatchers”, como tambe radarkamer, y con lo duna contenido na trabao a traves di “real-time intelligence”. Esaki ta sumamente importante pa asina por resolve casonan mucho mas lihe y eficiente y brinda e polisnan cu ta traha riba caya cu informacion real. Esaki ta nifica, informacion instantaneo di actonan cu ta sosode na e momento ey, cual ta bay percura tambe pa e siguridad di e propio agente policial.

E cooperacion entre Aruba y Corsou ta mutuo entre otro pa medio di intercambio di informacion cu Aruba den cuadro di ACTPOL. E intercambio aki ta percura cu nos por combati criminalidad mucho mas miho y eficiente, na nivel local como tambe regional.