Minister di Finansa y Cultura a bishita museo di Tula na Corsou
ORANJESTAD - Recientemente, Minister di Finansa y Cultura Xiomara Maduro tabata na Corsou den nomber di Gobierno di Aruba na e celebracion di Dia di Bandera di Corsou y a haci uzo di e oportunidad pa bishita Museo di Tula situa na Landhuis Kenepa conoci tambe como Plantage Knip.
Na Museo Tula, historiado sra. Jeanne Henriquez a compaña Minister Maduro y a conta e storia di Tula su lucha, resiliencia y e proceso encamina pa emancipacion cu a tuma luga bou su liderazgo na Corsou. Den e museo sin muraya manera ta yama Museo Tula, por haya un bista di e personahenan importante na Africa, den Caribe y otro pais cu a sirbi como inspiracion pa e lucha cu Tula a hiba pa libertad. Ademas tin hopi obra di arte inspira pa e lucha di emancipacion cu a tuma luga den nos region na mesun momento cu Tula tabata bataya na Corsou. Un seccion den e museo ta corda nos riba e rol di e hende muhe den e lucha pa emancipacion.
Minister Xiomara Maduro ta gradici pa e oportunidad pa a conoce mas di cerca e lucha di Tula, y ta spera cu den futuro e museonan di Aruba y Corsou por tin un colaboracion cu otro pa asina nos por conoce e storia di emancipacion y libertad di nos pueblonan.