Minister di Cultura a bishita museo y biblioteca Mongui Maduro na Corsou

E museo ta duna un bista di e bida di e famianan Hudiu Sefardita cu a establece nan mes na Corsou, y ta conecta cu un biblioteca unda tin un coleccion grandi di informacion di Antiyas y Judaica.

Na Museo di Mongui Maduro, sra. Thamara Moreno-Verhuurt, a repasa e historia di 4 generacion di e famia Hudiu Sefardita Levy Maduro cu a establece nan mes den siglo 17 na Corsou. Den Landhuis Rooi Catootje na unda e museo ta situa, por aprecia un parti di e historia mercantil di Corsou y e rol di e famia Levy Maduro den esaki. Por admira mueble antiek y obhetonan memorabel cu a forma parti di e bida di e famia kende su descendientenan tabata comerciantenan cu a marca historia y tabata ciudadanonan cu a ocupa puestonan importante den comunidad di Corsou y den region. Sr. Salomon (Mongui) Abraham Levy Maduro a colecta tur informacion di e islanan di Antiyas desde cu e tabata tin 14 aña y despues cu ela fayece su casa, yiu y nuero a sigui cu e trabou di conserva informacion cu ta duna nos awe un bista di kico tur tabata pasa na Corsou, Aruba y e otro islanan. Ademas Mongui y su famia a percura tambe pa e coleccion Judaica, cu ta duna un bista di e bida di e comunidad di Hudiu na Corsou y den region.

Minister Maduro ta gradici Museo Mongui Maduro y Biblioteca Mongui Maduro pa e guia y informacion comparti durante e bishita.