Minister Cicilia ta destaca Liderazgo Hubenil na Nacionnan Uni di 30 Aniversario di e Plan di Accion Global pa Hubentud

E evento di nivel halto, convoca na Cede di Nacionnan Uni bou di e tema “Opening High-Level Event: 30 Years of the World Programme of Action for Youth,” a trece lidernan hunto na New York pa refleha riba tres decada di empoderacion di hubentud y delinea strategianan nobo pa futuro.

Minister Cicilia, e minister di mas hoben den Reino Hulandes, a enfatisa e urgencia pa garantisa participacion significante di hubentud den tumamento di decision.

“Empodera hubentud awendia no ta djis un inversion den futuro, e ta e fundeshi di un mañan mas sostenibel y inclusivo”, Minister Cicilia a afirma.

E discusionnan durante henter e evento a enfoca riba e rol critico di hobennan den atende cu retonan mundial manera cambio di clima, resiliencia economico, inclusion social y construccion di paz. Delegadonan a enfatisa cu liderazgo hubenil ta esencial pa construi sociedadnan mas fuerte y sostenibel.

E evento a reafirma e compromiso di e comunidad mundial pa crea espacio pa e siguiente generacion prospera no solamente como participante, pero como partner y arkitecto completo di cambio.