Mini turf di futbol haya un cas nobo na Fontein Kleuterschool

A instala e mini turf aki anteriormente na Carnival Village na San Nicolas durante temporada di Copa Mundial, caminda muchanan y famianan a haci ampliamente uzo di dje pa disfruta di e ambiente futbolistico. Awor, e facilidad ta haya un siguiente destino na Fontein Kleuterschool, caminda e lo sigui cumpli cu un funcion deportivo y recreativo diariamente.

E traslado di e mini turf pa un scol ta un manera concreto pa sigui crea mas oportunidad pa muchanan move y familiarisa cu deporte.

“Nos kier pa nos muchanan haya oportunidad pa move, hunga y descubri deporte desde edad tempran. Cu e mini turf aki directamente na scol, nos ta crea un espacio sigur y accesibel caminda nan por practica futbol, disfruta di movecion y posiblemente planta e prome semia pa un talento deportivo cu por sigui desaroya den futuro,” Minister Croes a expresa.

E iniciativa ta cuadra cu e vision di Ministerio di Educacion y Deporte pa crea mas espacio y facilidad pa actividad fisico den ambiente escolar. Ademas di e beneficio fisico, deporte y movecion ta contribui na interaccion social, trabou den team y bienestar general di muchanan.

Promocion di un estilo di bida activo mester cumisa for di edad tempran y cu scol ta un lugar importante pa stimula esaki.  

E entrega di e mini turf ta conecta tambe cu e movemento nacional rumbo pa ARUBA ACTIVO, cu lo tuma luga dia 27 di september 2026 na Bushiri Beach. E evento tin como meta reuni comunidad y sigui stimula deporte, actividad fisico y un estilo di bida activo.

Ministerio di Educacion y Deporte ta desea e alumnonan y team di Fontein Kleuterschool hopi placer cu nan mini turf nobo y ta encurasha nan pa haci bon uzo di e facilidad.