Milly Schwengle a huramenta como Minister Plenipotenciario
ORANJESTAD – Riba 4 di maart 2026 na Cas Ceremonial di Gobernador di Aruba, Su Excelencia Gobernador di Aruba, Alfonso Boekhoudt, den presencia di Conseho di Minister, a tuma luga e huramentacion di mr. M.G.M. (Mildred) Schwengle como Minister Plenipotenciario pa Hulanda.
Cu esaki, Aruba ta fortalece su representacion strategico den Reino y su presencia na Europa.
Mildred G.M. Schwengle LLM ta un experto legal cu amplio experencia den derecho constitucional, derecho publico internacional, gobernacion (publico y priva), financiamento y negociacion di alto nivel. Schwengle a studia Derecho Hulandes na Katholieke Universiteit Nijmegen (awor Radboud Universiteit Nijmegen) entre 1984 y 1989.
Su carera profesional a cuminsa den Ministerio Publico como plaatsvervangend Procureur Generaal (1990-1992) y despues como griffier na Gerecht di Prome Instancia di Aruba (1992-1994) . Na 1994 Schwengle a bira abogado y desde 1996 te 2017 tabata partner na HBN Law, sirbiendo Aruba, Corsou, Boneiro, Sint Maarten y Saba.
Entre 2017 y 2023, Schwengle a ocupa e posicion prestigioso como miembro di Raad van State di Reino na Hulanda y a acesora Gobierno di Reino riba legislacion, decreto y tratadonan internacional, cu enfasis riba relacionnan den Reino.
Ademas di su experencia institucional, Schwengle a actua varios biaha como abogado principal den proyectonan grandi di financiamento, privatisacion di fondo di pensioen y adkisicion internacional cu interesnan miyonario. Actualmente Schwengle ta dirigi negociacionnan den Reino riba finansa publico sostenibel y supervision financiero pa Gobierno di Aruba.
Cu un trayectoria caracterisa pa liderazgo, integridad y experticio huridico, Milly Schwengle tin un combinacion unico di experencia di sector publico y priva. Gobierno di Aruba ta expresa su confiansa pleno cu Schwengle lo representa interesnan di Aruba cu dignidad, responsabilidad y vision strategico den Hulanda y den Reino.
Nombramento di Schwengle como Minister Plenipotenciario ta marca un paso firme den fortalecemento di e posicion di Aruba den Reino, cu enfasis riba cooperacion, dialogo y defensa di interes nacional.