Miembro nobo den e colegio di supervision financiero CAft a reuni cu Gobierno
ORANJESTAD – Riba dia 6 di augustus, Prome Minister Evelyn Wever-Croes hunto
cu Minister di Finansa y Cultura, Xiomara Maduro a reuni cu sr. Marion Agunbero kende ta e
miembro nobo pa Aruba den e Colegio di Supervision Financiero pa Aruba (CAft).
Presente pa e reunion tawata e miembro saliente, sra. Hellen van der Wal.
Desde 1 di augustus 2024, señor Marion Agunbero ta e miembro nobo pa Aruba den CAft. Dia 21 di juni 2024, Conseho di Minister di Reino a aproba e proposicion di Aruba pa nombra señor Agunbero como e miembro nobo. Señor Agunbero ta un persona cu hopi experiencia na entre otro Departamento di Finansas, Banco Central, Raad van Advies y cu Fondo di Pensioen. E ta un
persona cu hopi conocemento y awo lo fungi den CAft como e miembro nobo pa Aruba.
Sra. van der Wal a sirbi Aruba durante dos periodo pa un total di 6 aña durante temponan hopi dificil. E pandemia di Covid19 a crea bastante turbulencia den e relacion di CAft y Gobierno cu mester a trece stabilidad den e situacion financiero afecta pa e pandemia.
Den nomber di Gobierno di Aruba, Prome Minister ta gradici sra. Hellen van der Wal pa su
trabou y ta desea sr. Marion Agunbero hopi exito den e periodo su dilanti.