Memorandum of Understanding (MoU) pa fortalece un modelo durabel di cuido medico specialisa na Aruba.

A firma e MoU hunto cu instancianan clave den e sector di cuido medico specialisa. Esaki ta inclui e Uitvoeringsorgaan Algemene Ziektekostenverzekering (AZV), Dr. Horacio E. Oduber Hospital (HOH), Instituto Medico San Nicolas (ImSan), Vereniging Medisch Specialisten Aruba (VMSA), Asociacion di Specialista Hospital di Aruba (ASHA), Arubaanse Vereniging van Specialisten in Dienstverband (AVSD) y ImSan’s Specialist Association Aruba (ISAA). E colaboracion amplio aki ta subraya e importancia historico di e acuerdo.

Cu firmamento di e MoU, e Ministerio di Salud Publico, Asunto Social, Cuido di Adulto Mayor y Maneho di Adiccion a confirma su compromiso cu e implementacion di e acuerdonan cu ta enfoca riba cooperacion structural, confiansa mutuo y responsabilidad comparti. E meta ta pa sigura un sistema di cuido medico specialisa cu ta sostenibel, transparente y cu ta pone e bienestar di e pashent central.

Segun Minister Melvin Wyatt-Ras:
“E MoU aki ta demostra cu colaboracion y compromiso concreto por contribui na un sistema di cuido medico specialisa mas fuerte pa Aruba. Esaki ta un paso importante pa sigura cu cuido ta keda accesibel, di bon calidad y financieramente sostenibel pa nos pueblo.”