Mehoracion grandi pa transporte comercial entre Aruba y Republica Dominicana

Cu e participacion na Agroalimentaria 2025 nos ta duna nos empresarionan aceso na exportadornan di producto di alimentacion di Santo Domingo y facilita e hacimento  di negoshi den un otro pais. E meta ta pa nos haya aceso na productonan di fruta y berdura na prijs mas economico y den otro mercado, pa reduci nos dependencia di un of dos mercado so, segun Minister di Finansa, Asunto Economico y Sector Economico Geoffrey Wever.

Gobierno a ricibi e bon noticia cu Don Andres, un compania  den logistica den Caribe, ta anuncia un desaroyo nobo den su servicio di transporte pa Aruba. Cu e apertura recien y operacionando ya pa dos luna di facilidadnan moderno di almacenamiento, awor Don Andres ta ofrece un mihor solucion pa clientenan cu ta busca un manera eficiente y rendabel pa consolida container for di Republica Dominicana.

E capacidad nobo aki ta duna negoshinan na Aruba e oportunidad pa mehora nan logistica di envio, cu un maneho di inventario mas eficas, un tempo di entrega mas rapido y un reduccion den gastonan di transporte. Door di consolida e mercancia den e almacennan di Don Andres, clientenan por optimisa nan “supply chain” y probecha di solucionnan di envio adapta na nan necesidad specifico.

Minister Wever ta gradici e 30 empresarionan di Aruba, y Departamento di Asunto Economico, Comercio E industria (DAECI) di Aruba pa nan tremendo trabou ehecuta na Republica Dominicana durante e dianan di e feria.