Mauriëlle Tromp a obtene su Bachelor of Arts den Organization, Governance and Management (OGM) na Universidad di Aruba

Recientemente, Mauriëlle a presenta su tesis di graduacion titula "Fostering Strong Institutions and Informed Citizens: An Exploratory Research on Civic Communication of Public Financial Management by the Court of Audit Aruba" na Algemene Rekenkamer.

Na 2021 Mauriëlle a core stage na Algemene Rekenkamer, durante di cua e la haci un inventario di e recursonan di comunicacion di Algemene Rekenkamer, dunando como resultado inicio na un plan di comunicacion. Consecuentemente, e tesis ta haci un contribucion valioso pa analisa y mehora e comunicacion entre Algemene Rekenkamer y e ciudadano. E estudio ta enfoca riba con Algemene Rekenkamer por comunica miho e resultadonan di nan investigacionnan tocante maneho di finansa publico.

E tesis a explora con e ciudadano ta percibi comunicacion di Algemene Rekenkamer y con por mehora esaki na interes di e ciudadano. Tin beneficio pa mehora comunicacion riba varios nivel: maneho, incluyendo institucional, nacional y internacional.  Na e nivel institucional, esaki ta significa contribui na fortalece e capacidad organisatorio. Na e nivel nacional, esaki lo contribui na e forsa gubernamental di Pais Aruba relaciona cu e reformanan stipula den Landspakket. Na nivel internacional, esaki ta encera mehora  comunicacion relaciona cu e avance den Agenda 2030, pa loke ta trata e Metanan di Desaroyo Sostenibel (SDGs) di Nacionnan Uni, particularmente SDG 16: Peace, Justice and Strong Institutions.

A base di e resultadonan di e investigacion a propone diferente recomendacion na Algemene Rekenkamer pa mehora comunicacion. Algun recomendacion ta:

• inclui implementa un plan strategico di comunicacion;
• comparti informacion dirigi na audiencia specifico pa loke ta trata e tema di investigacion;
• evalua comunicacion cu e ciudadano periodicamente pa mantene bista riba expectativanan di comunicacion.

Algemene Rekenkamer ta gradici Mauriëlle pa su tesis y ta felicit’e cu su graduacion. Tambe ta desea Mauriëlle hopi exito den futuro.

Pa mas informacion por tira un bista riba e tesis:

Fostering Strong Institutions and Informed Citizens: An Exploratory Research on Civic Communication of Public Financial Management by the Court of Audit Aruba.