Mas organisacion ta uni forsa pa prepara "Dia Nacional pa Cuida Aruba"
ORANJESTAD - Dia Nacional pa Cuida Aruba ta un iniciativa di Gobierno cu ta busca fortalece responsabilidad comparti den cuido di nos isla.
Cu e lema "P'ami. P'abo. Pa nos tur.", e campaña ta invita ciudadano, empresa, scol, clubnan, fundacionnan y organisacionnan pa uni forsa den un gran accion nacional di limpiesa riba diasabra 25 di juli. Ademas di limpia diferente area rond Aruba, e iniciativa tin como meta crea mas conscientisacion cu cuido di nos entorno ta un responsabilidad cu nos tur ta comparti y cu un Aruba limpi ta cuminsa cu e compromiso di cada ciudadano.
Den cuadro di e preparacionnan, Prome Minister Mike Eman a reuni cu representante di diferente organisacion cu lo hunga un papel importante den e realisacion di e iniciativa. Durante e reunion a participa Jeremy Croes, Managing Director di Compania Arubano di Petroleo (CAP), Rino Hermans, director di Crisis Management Office (CMO), y Marc Figaroa, CEO di Aruba Ports Authority (APA), Esther Emerencia-Gomes, director di Post Aruba N.V., como tambe ir. Roland Croes, CEO di SETAR N.V..
Durante e encuentro a discuti e coordinacion entre diferente partnernan, e apoyo logistico y e forma con cada organisacion por aporta pa haci e accion nacional un exito. Jeremy Croes a expresa cu CAP ta mira e iniciativa como un accion positivo cu ta refleha e boluntad di comunidad pa contribui na un Aruba mas limpi. El a indica cu, apesar cu CAP ta un organisacion relativamente chikito, nan lo evalua e posibilidadnan pa brinda apoyo y participa den e actividad.
Rino Hermans a resalta cu e iniciativa tin un balor strategico, specialmente durante temporada di horcan. Segun dje, un Aruba limpi ta yuda reduci riesgo di daño na infrastructura durante mal tempo y tambe contribui na salud publico door di disminui riesgo cu por resulta di desperdicio den comunidad. El a indica cu CMO lo aporta su experiencia den coordinacion y planificacion pa facilita e colaboracion entre e diferente partnernan y contribui na un bon desaroyo di e accion.
Marc Figaroa a confirma cu Aruba Ports Authority ta sostene plenamente e iniciativa. El a señala cu e campaña ta yuda fortalece consciensia tocante e importancia di cuida nos isla y a indica cu APA lo brinda apoyo logistico, incluyendo container, pa facilita e accion di limpiesa.
Cu "Dia Nacional pa Cuida Aruba", Gobierno ta invita tur sector di comunidad pa participa activamente y demuestra cu, ora nos uni forsa, nos por haci un diferencia real pa preserva Aruba limpio, bunita y prepara pa e generacionnan cu ta bin despues.
Dia pa Cuida Aruba
"Dia Nacional pa Cuida Aruba" ta un iniciativa di Gobierno cu ta busca fortalece responsabilidad comparti den cuido di nos isla. Cu e lema "P'ami. P'abo. Pa nos tur.", e campaña ta invita ciudadano, empresa, scol, clubnan, fundacionnan y organisacionnan pa uni forsa den un gran accion nacional di limpiesa riba diasabra 25 di juli. Ademas di haci diferente area rond Aruba limpi, e iniciativa tin como meta crea mas concientisacion cu cuido di nos entorno ta un responsabilidad cu nos tur ta comparti.