Mas fondo pa "Stimami Sterilisami"

Esaki ta representa un aumento significativo compara cu e añanan anterior, subrayando e compromiso di Gobierno di Aruba pa atende e poblacion di pushi y cacho riba e cayanan di Aruba pa medio di trece solucionnan humano y sostenibel.   

E ceremonia di firmamento a trece e partnernan clave hunto, entre otro Ronella Croes CEO di Aruba Tourism Authority, Crescenzia Biemans como Secretaria di Stimami Sterilisami y Rik van der Berg di Bucuti & Tara Beach Resort. Hunto, e organisacionnan aki ta forma un coalicion fuerte dedica na mehora e bienestar di bestia, proteha medio ambiente di Aruba y engrandece e imagen turistico di nos isla.   

E manera cu e bishitantenan ta experencia Aruba ta estrechamente mara na bienestar di nos comunidad. Sobrepoblacion di bestia riba caya no solamente ta afecta siguridad publico y nos medio ambiente, pero e ta impacta tambe e manera con ta percibi nos isla. Door di aumenta nos sosten na 200.000, nos ta haciendo un inversion fuerte y compasivo den nos producto turistico, nos medio ambiente y nos hendenan”, asina Minister di Turismo, Transporte y Labor mr. Wendrick Cicilia, a expresa.   

Ronella Croes, CEO di Aruba Tourism Authority, a expresa cu e ta un honor pa por contribui pa di 8 biaha cu Stimami Sterilisami. “Si bay bek den tempo for di aña 2016 ATA ta brinda sosten na e causa aki”, asina Ronella Croes a expresa. Durante e añanan, Aruba Tourism Authority a contribui un total di 850.000 florin pa medio di fondonan di turismo.   

E financiamento aki lo permiti Stimami Sterilisami pa sigui ofrece proceduranan di sterilisacion, pero e biaha aki gratis pa cacho y pushi rond di nos isla, garantisando cu ningun bestia no ta keda sin sterilisacion pa motibo di limitacion financiero. E proyecto tambe ta incorpora educacion y esfuersonan di alcance pa promove un propiedad responsabel di bestia di cas y control di poblacion a largo plaso.    

“Danki na e contribucion di TPEF y ATA, cu nan a redobla e aña aki, lo por tin un suma di 800.000 cu ta haci posibel pa comunidad di Aruba por sterilisa nan mascota completamente gratis”, tabata expresion di Crescenzia Biemans, CCO di Chief Corporate Officer di Bucuti & Tara Beach Resort. Aruba Tourism Authority a aloca 200.000, TPEF tambe 200.000 y Bucuti & Tara Beach Resort a aloca un total di 400.000 florin pa haci e proyecto aki posibel.   

E proyecto di  Stimami Sterilisami ta alinea directamente cu e mision di TPEF pa inverti den proyectonan cu ta engrandece e producto turistico di Aruba mientras ta beneficia comunidad y medio ambiente. Door di atende e tema aki colaborativamente, Gobierno y su partnernan ta reenforsa e reputacion di Aruba como un “One Happy Island” tanto pa hende como tambe pa bestia.