Lansamento di fase 1 di 'Learning Cities Aruba'

Mundo ta cambiando na un ritmo rapido. Inteligencia artificial, digitalisacion, reto di clima y e incertidumbre global ta redefini totalmente e forma con nos ta biba, traha y siña. Pa responde na e realidad aki na un manera strategico, a nace Learning Cities Aruba, un iniciativa nacional conecta cu e Red Global di Ciudadnan di Enseñansa di UNESCO.

Esaki no ta simplemente un proyecto mas; esaki ta un transformacion di nos sistema di educacion. E meta ta pa crea un cultura di siñamento continuo y inclusivo cu ta yega na tur skina di nos sociedad atraves di tayer, cursonan y actividadnan practico den tur e barionan rond di Aruba.

E proyecto aki ta lo consistiti di un red di colaborador cu ta haci e diferencia. E colaboracion lo ta entre otro cu Universidad di Aruba y IPA, na vanguardia di investigacion, educacion pa adulto y e formacion continuo di nos docentenan y lidernan educativo. Tambe lo traha cu Tienda di Educacion, kende ta brinda apoyo y recurso educativo directamente den e barionan pa esnan cu mas mester di dje. Finalmente nos lo tin expertonan local y internacional den temanan clave manera multilinguismo, inclusion den Caribe, design thinking y AI.

E iniciativa ta un invitacion habri pa tur sector di e comunidad, reconociendo cu e miho recurso di Aruba ta su mesun hende. Ministerio di Educacion ta enfatisa cu e sociedad y compromiso cu educacion cu nos ta traha hunto lo ta e fundeshi di tur locual Aruba ta aspira pa logra.

Ta haci un yamada na individuonan cu ta enfoca den maneho (policymakers), lidernan educativo, organisacionnan comunitario y partnernan internacional pa uni forsa y co-crea e plataforma nacional aki cu lo posiciona Aruba como un modelo regional di enseñansa, innovacion y resiliencia.