Kwaliteitsinstituut Gezondheidszorg (KIG) ta lansa website nobo y portal digital ‘AruREG’
ORANJESTAD - Instituto di Calidad den Cuido di Salud (Kwaliteitsinstituut Gezondheidszorg - KIG) ta anuncia cu orguyo e lansamento di su website nobo y portal digital pa registracion, AruREG.
For di dia 2 di februari 2026, e website www.kig.aw ta oficialmente activo. A establece e website como e plataforma central di KIG pa informacion tocante calidad den cuido di salud na Aruba, incluyendo tambe normanan, guianan, leynan y reglamentonan relevante. Ademas di informacion, ta posibel pa entrega solicitudnan di registracion di manera digital via e website. Pa profesionalnan di salud, esaki ta bay pa medio di e portal AruREG.
Cu e introduccion di e portal AruREG, KIG ta pone fin na e formulario digital unico cu tabata uza pa solicitudnan di profesionalnan. E ambiente nobo di portal ta garantisa un proceso mas eficiente y transparente. Solicitantenan por maneha nan propio dossier y sigui directamente status di nan solicitud.
Na e momento aki, e portal ta destina exclusivamente pa solicitudnan di registracion nobo dentro di e cinco gruponan profesional legalmente establece, esta dokter, apotheek, fisioterapista, dentist y partera. Ora leynan y reglamentonan pa otro grupo di profesional drenta na vigor, lo amplia e portal AruREG di manera gradual.
E lansamento di www.kig.aw y e portal AruREG ta solamente e comienzo. KIG lo sigui desaroya e website y e portal pa fortalece e provision di informacion, servicio y sosten na bienestar di calidad den cuido di salud na Aruba, dentro di su tarea legal.
Pa mas informacion:
- Like Facebook page Directie Volksgezondheid DVG Aruba,
- Follow nos riba Instagram directie_volksgezondheid_aruba
- Subi nos website www.dvg.aw
- Yama nos na 5224200
- Mail na servicio@dvg.aw
