KPA ta yama hoofd inspecteur Alvin Molina bon bini bek den e organisacion policial

Desde algun siman caba Sr. Molina ta trahando hunto cu Inspector Sr. Koolman pa asina e por haya tur informacion relata cu e trabao, conocimento y funcionamento di e departamento di Recherche.

Nos ta gradici desde awor na sr. Koolman pa su gran aporte y dedicacion na departamento di Recherche y nos Cuerpo pa tur e añanan.

Alto comisario sr. Ramon Arnhem ta hopi contento cu sr. Molina lo forma parti di Cuerpo Policial Aruba. “Cu Molina nos ta haya bek un polis experencia como tambe un lider. E ta un gran adkisicion pa nos Korps Management Team (KMT). E ta trece no solamente conocimento y experencia pero tambe contactonan amplio. Mi tin hopi confiansa den un colaboracion bunita y efectivo “tabata palabranan di Arnnhem.

Tocante di Alvin Molina

Despues di completa su estudio di VWO, Molina a studia na Nederlandse Politieacademie (NPA) na Apeldoorn. Despues di gradua, Molina a traha entre otro na e Regionaal Recherche Samenwerkingsteam (RST) sigui pa hefe di districto di Oranjestad como tambe San Nicolas y tabata team lider di Team di aresto. Den su ultimo funcion e tabata un miembro activo den Parlamento di Aruba y dentro di poco e ta bek cerca nos na KPA.

Nos ta mira sigur un colaboracion positivo hunto pa bienestar di nos organisacion policial y pa siguridad di nos Pais.